3Jo | APZ | STEP |

3 Joun Olo Iyoswo Nom'ne Tɨfinjo loso Joun Afahwo Mtɨ'mokumentisofoho.

Olo Hungkuno sɨmo'mjofoho.

Jisas ahwomomne'no nto sɨmentiso sohonta soswosikɨsɨti'nji (60)sikɨsɨti-sikɨs'nji (66) nto uyakolo'mentiso ajwo sopolɨkeno olo iyoswo ne'no tɨfinjo loso Joun afahwo mtɨ'mokumentisofoho. Olo iyoswo hiloso Ngkaiyasɨmne'no mtɨ'mokumentisofoho. Ngkaiyos sohwo Jounɨye a'amu hweho. Kako oso hwaho engo Esiya sopo humunyo hweho. Joun oso ango hopo sopo ne'no a'amu syoho'njo sohwa uhwajɨmonto imentisoso Ntiyoutɨlefes kako oso a'amu yofe hwe engo'njo umo'nɨmonto oso a'amu syoho'njo sohwamo monje esyahonɨngki Joun kako hwe anga'no kakoe yofe Ntemitɨliyos osohumo yofe ho'nomanto uhwajɨmentisofoho. Olo iyoswo loso Jounɨye a'amu Ngkaiyos sohwo Ntemitɨliyos syoho yahonɨngkuhwosi hofiyo umokosyohumane'ento olo iyoswo loso'nji mtɨ'mokumentisofoho. Oso'no nakwo olo hungkuno homo lomo atofo lɨhwasi tɨfi unɨngkohwano.

3 John

1 Ngko Anɨtuye mehomi somo mokosyohumawo'nɨngkohe sohwo'ni ngko nje nɨngkwahwo Ngkaiyos sohwo hnne'no olo iyoswo loso kumtɨ'mokiyalokweno. Ngko kikimo nehopi sɨmeho kijopalokweno.

2 Nje a'amu sohwosi, kɨko yo'mayo syoho wopɨngo yontanɨngkini Anɨtu kufo'malokunjo so'nji kɨko wopɨngo humahnno so'no ngko Mpohumo jomo ulalokweno. Jɨje huyo'mango so'no ngko huno niyohoho wopɨngo humaho. I jɨje huyo'mango wopɨngo humaso hopaso jɨje a'apaho hi'nji wopɨngo osenohini humahnno so'no Mpohumo jomo ulalokweno. 3 A'amu fehohnjo Anɨtumo sɨmeho hi'ntnnono uyɨwo'nɨngkohofoso jɨje angopo nta'ni nɨ'mantɨfi ntɨmalofi, Ngkaiyos sohwo kako Anɨtuye hungkuno ne somo aho yokumpohn'nyo kemokosyohumanto hofiyo'no inɨngkowalofoho. Ose ntahonɨngkofi ngko sɨmonyo imalefoho. 4 Nje mehomi hofɨko Anɨtuye hungkuno ne somo inɨngkowalokwofo so'no upa'nonji oso'no ngko sɨmonyo iwo'nɨngkohe hwo'nyoho. Oso sɨmonyo iyo hiso nom'ne yo'mayo so'no sɨmonyo iwo'nɨngkohofo somo yakolo'nnyofoho.

Ngkaiyos syoho wopɨngo imentisofoho.

5 U nje a'amu sohwosi, kɨko a'amu Anɨtuye hungkuno lɨku'mofɨwo'nɨngkohofo sohwamo ufo'mawo'nɨngkinoso oso wonyoangkafofoho. Jɨje a'amu'nohinɨ'maho. O'o, a'amu kengo mta'ango sohwanjoho. 6 Oso a'amu huhwo sohwa hofɨko olopo nɨ'mantɨfi kɨko hofɨkimo wopɨngo uloho'mahnno so'no nakwo Anɨtune'no uhu'mokontanɨngkuhwoni nalɨmalofofoho. Kɨko a'amu Anɨtuye hungkuno lɨku'mofo sohwamo jɨje angopo nta'ni hano hofiyo'no hmmofɨhwajo. Ose yahonɨngkiji Anɨtuye sɨmeho wopɨngo umo'nɨmontonoho. 7 Hofɨko oso syoho yalokwofoso Kɨlaisɨye yofe ho'nomayo'ne yalokwofo. A'amu Anɨtumo sɨmeho hi'ntnnono muyo'njo sohwa mta'ni hofɨko hamniyoho yo'mayoso momaso'njo yalokwofo. 8 Nakwo Anɨtuye a'amu ne hn'nwi nakwo oso a'amu huhwo sohwamo ufo'mano. Ose ihwasi oso hungkuno syoho ne'njo so'no nakwo syoho afa'no womojoku'nantanoho.

Ntiyoutɨlefes kako yahino wonyo imentisofoho.

9 Ngko oso a'amu Ntiyoutɨlefesɨ'nji Anɨtumne'no uhu'mokuwo'nɨngkohofo somne'no ngko iyoswo nom'neso nto mtɨ'mokumalefoho. Ntiyoutɨlefes sohwo kako a'amu hiso hofɨko nakwoe hwe engo hwosoho ulantɨfe'no yalokunjo so'no kako nje hungkunomo haloho manɨpewo'nɨngkiso hweho. O'o, kako nje hungkunomo hwotoho nɨfewo'nɨngkiso hweho. 10 Oseso ngko sekumo se'ma'me'manji ngko yo'mayo kako iwo'nɨngkiso so'no waselɨmonnoho. Kako nakune'no yo'mayo hungkuno wonyo lalofoho. Kako hwasyo hungkuno lalofoho. Oso'nohini'maho. O'o, kako a'amu Anɨtuye hungkuno lɨku'mofo sohwamo kakoe angomo mipemotasyɨwo'nɨngkiso hweho. I a'amu nom'neso hofɨko oso a'amu Anɨtuye hungkuno lɨku'mofo somo nje angomo upemokosyawo'mo loso sohumo Ntayoutɨlefis sohwo kako hofɨkoe honɨngkano pɨjumofɨwo'nɨngkiso hweho. Oseso kako oso a'amu homo somo hofɨko Anɨtumne'no uhu'mokiyo somta'ni wae weeo'mto yalofoho.

Ntemitɨliyos sohwo kako yahino wopɨngo iwo'nɨngkiso hweho.

11 U nje a'amu sohwosi, kɨko yahino wonyo somo tɨfi inɨngkahutoho. O'o, honɨngkano wopɨngo somnohini tɨfi finɨngkayo. A'amu kako yahino wopɨngo'njo sohwo kako Anɨtuye a'amu hweho. A'amu kako yahino wonyo iwo'nɨngkiso oso hwo kako Anɨtune'no huno mosyafɨsiyo hweho.

12 A'amu hopi'nonohino sohwa hofɨko Ntemitɨliyosɨye yofe ho'nomalokwofo. Nakwo Ntemitɨliyos osohumo uhwonontani nakwo Kɨlaisɨye yahino ne somo uhwonalokuhwono. Oso'no ngko huhwo'ni kakoe yofeso ho'nomalokweno. Oso'no kɨko huno kiyohoho, Nje hungkunoso ne'njofoho.

Hungkuno ae'uyofoho.

13 Oseso ngko hungkuno sawemo waselɨmonji ko yoheso oso'no ngko iyoswomo mamtɨ'mokumnehono. 14 We'enepi ngko noku'mahm'me'no nekwo hungkuno wohnnantaeho.

15 Jɨje sɨmehoso pompengo ufɨsyakumofono. Jɨje a'amu olopo humalofo sohwa hofɨko nje hwomuhwe kilalokwofo. Nje a'amu kɨko'nji humalofo sohwamne'no nje a'amufo ulalokweno. Kɨko hofɨkimo njiyo. Osohopeho. Ngko Joun'ni hungkuno loso mtɨ'mokohono.